現年73歲、人稱「潘翁」的潘志文從影超過50年，拍過無數電視劇和電影，早已移居加拿大多年的潘志文，早年回流返港以玩票性質拍劇，因曾在劇集《再創世紀》、《以和為貴》、《幕後玩家》及《EU超時任務》飾演中風角色被封為「御用中風王」。近日潘志文接港台節目《守下留情》主動提起與顏國樑因一句話而惹起誤會並遭人話：「我點解咁樣對朋友！」
【相關閱讀】：顏國樑患鱗狀癌三期多次走出鬼門關 願做大體老師令生命更有意義
【點擊睇潘志文顏國樑歷年演出】：
潘志文在訪問中說：「我同顏國樑好老友，係沙煲兄弟，佢有次做訪問，提到當年我好紅，嗰陣佢或者比較失意，去咗做番輔警，有一日我約佢食飯，食完飯佢就爭畀錢，佢就話我話：『爭乜鬼呀，我搵錢易過你，我畀啦』咁，呢句說話好大迴響，好多朋友話我點解要咁樣講嘢！」潘志文話自己想澄清一下：「我唔係咁講，我係話：『我搵錢多過你，爭乜鬼呀，我畀啦！』，我係咁樣講，有咩分別呢？係有，我搵錢唔容易，絕對唔會易過你，但我真係搵得多過你，我辛苦嘛，所以咪搵得多過你，我請囉，又唔係多！我希望講番個真相出嚟。」問到有沒有影響兩人之間感情，他說：「近年我哋比較少接觸、少來往，大家都好少見面，但自從呢個訪問出街，好多人追住我問，話我點解咁樣對朋友，事實上我都係出心，係對你好！」
顏國樑在2009年約滿TVB後離巢，其後轉行教太極，近年更移居國內，已甚少參與港劇演出，養尊處休，鮮有公開露面，生活低調。2021年曾接受好友鄧英敏的YouTube節目《老友鬼鬼》訪問，雖然當時他聲如洪鐘，但原來幾年前曾與死神擦肩而過，曾因酗酒成性導致「屙血尿」。顏國樑當時又提到入行初期試過轉行做警察，但有一次與好友潘志文飯聚，當時潘志文已經是當紅小生，人氣極高，到結賬時，潘志文以一句「你唔好同我爭，我搵錢易你好多」而成功請客， 結果顏國樑說：「我就叮一聲，我就讓佢畀錢啦！其實佢好客氣，你諗吓，我當差1,300蚊人工多啲，相比之下，佢真係太勁，一講你就收皮喇！」
潘志文於1967年入行，做過播音員的他在馮淬帆賞識下加入TVB劇集《變》擔正男主角，其後憑香港電視劇集《小時候》、《獅子山下》走紅，加盟亞視後更成為電視劇一哥，在經典長劇《鱷魚淚》、《變色龍》、《新變色龍》及《大地恩情》等都擔綱演出。當年他和鄭少秋同樣飾演「楚留香」，但由於《楚留香》的劇名被TVB搶先購下，潘志文在訪問上與鄭少秋私下是識英雄重英雄：「我扮楚留香對白色靴都係寫鄭少秋個名呀！其實當年好茅躉，租架開篷巴士著晒古裝特登駛去無綫門口。」
潘志文續指初時與鄭少秋並不熟絡：「後來1995年就同佢喺無綫合作《天地男兒》，秋官仲搞笑話我對眼大佢咁多，我話我老花眼鏡所以大啫！」潘志文表示當年拍劇非常辛苦，不過食得鹹魚抵得渴，「既然電視台花資源捧紅，冇可能唔博！後遺症就係冇機會休息，連刷牙都冇機會，搞到有牙周病！而且成日拍古裝，頭套幾日唔除，焗住晒啲加埋膠水 ，搞到好快髮線向上。」
