區永權（Albert）第4度獲提名「最佳男主持」終得獎，但他以為當晚只是「戥人高興」，完全沒準備謝詞，結果遺漏了答謝已離世的爸爸，令他相當自責，因伴着他成長的爸爸其實是後父，而生父給他的印象只有家暴，3歲時曾被生父將他頭塞入馬桶令額頭爆血，這段悲慘經歷令他學識如何當個好爸爸。而得獎後，他最想有機會主持更多大騷，還希望挑戰自己參加《中年好聲音》。採訪：杜杜 攝影：朱偉彥 服裝:Harrison Wong
Albert 由2021年開始先後4次獲提名《萬千星輝頒獎典禮》的「最佳男主持」，去年已打入5強，他以為今年再入5強繼續以旁觀者身份戥人高興，「事前啲仔有問我有冇機會攞，我仲斬釘截鐵話『唔會啦』！」正因冇預料得獎，事前沒準備的他，對台上表現極不滿意，「真係做得唔夠好，我要檢討，做乜都好要有兩手準備，我面部表情管理又好差，當時百感交集想喊都喊唔到。」
感激後父給完整家庭
由於當晚超時嚴重，Albert就長話短說，最終遺漏了多謝生命中很重要的人，「唯獨唔記得多謝天上嘅爸爸，佢對我嚟講好緊要，佢其實係我後父，雖然佢唔係我親生爸爸，但係畀到我感覺係好錫我，好遺憾唔記得感謝佢，但我相信佢喺天上係知道！」畀機會Albert代替上台向爸爸公開道謝，「多謝你阿爸！多謝你畀到家庭維繫嘅愛，我知你未必識點做阿爸，但係你令我識得點樣去做個好爸爸，我會盡力去做，都想講阿爸我得咗啦！」對於生父的記憶，他只有暴力，因生父有酗酒習慣，亦經常虐兒，最深刻一次發生在他3歲多，「我食橙骾親，吐咗啲橙喺地下，佢見到就拉咗我入廁所，佢覺得要吐就吐落馬桶，跟住將我個頭塞落個馬桶度，我好記得撞咗幾吓，見到個馬桶明明係白色變成紅色，因為我已經額頭爆咗，馬桶染滿晒血，但係佢唔當一回事，佢淨係幫我搵塊膠布黐住就算，我阿媽放工返到嚟梗係癲咗啦！」
悲慘童年學識當爸爸
由於生父家暴情況嚴重，Albert媽媽更曾報警求助，後來忍無可忍選擇離開，「阿媽毅然帶走咗我同阿哥，離開嗰個家庭時我大概4歲，記憶好模糊。」之後他跟生父沒有再見過面，「曾經有人問我好唔好同佢聯絡，但我真係冇呢個勇氣。」Albert媽媽後來認識了後父再婚，令他能在完整家庭下成長，「可能我細個比較可愛，佢係幾錫我，好慶幸遇到佢，所以上台攞獎時我講咗阿媽我得咗，唔記得多謝阿爸係有遺憾，因為唔知有冇下次攞獎機會嘛！」這個家庭背景他不單從未公開，就連兩個囝囝都是2年前才得知爺爺並非有血緣關係，「佢哋唔知道爺爺同我係唔同姓，知道時好愕然，我話畀佢哋聽生父係點樣，其實我都好少向身邊人提起，可能由細玩大嘅朋友先知，因為我仲有個妹妹係唔同姓，或者唔係稱呼我媽媽做區太。」他認為兩個囝囝年紀漸大，是時候跟他們交代，「佢哋知我好錫佢哋，但唔知我係用悲慘童年換佢哋嘅快樂童年，我細個遇到呢啲經歷，𠵱家做爸爸就唔希望喺我嘅家庭出現。」
曾志偉鼓勵參加《中年》
講到得獎後工作發展，Albert希望工作量增加外，亦想主持各個大騷。問到 2022年TVB台慶動用20個司儀，但他竟冇份一度成網上熱討，他也有思考過這問題，「嗰刻係百感交集，點解有啲騷冇自己份呢？！但我結論係自己做得未夠好，所以未有機會做住，相信如果做得好一定有人見到，咁咪再努力啲做好啲囉！」另外，他還希望參加《中年好聲音》，更親自問過總經理曾志偉意見，「我喺慶功宴問過曾生，我有冇機會參加《中年好聲音》？！我估佢第1個反應係話『畀多啲機會素人，公司同事唔好啦』，點知佢竟然話『點解唔得呀？！去啦』。」1999年已憑組合「星盒子」身份在台灣出道的他，對唱歌熱情一直沒變，更希望藉此挑戰自己，「讀書時參加過歌唱比賽後，都冇再參加，好想再試吓咁熱血，比賽令腎上腺素同戰鬥力提升，好想試吓自己心臟係咪負荷到。」他唯一擔心《東張西望》主持身份有角色衝突，「如果喺《東張》報道《中年》嘅消息時，我又係參賽者會有啲尷尬囉！」
