蘇致豪用謎之女聲即場配音 唯鍾情配動畫因可盡情發揮

蘇致豪(蘇豪)、許賢與劉展翹(Jackie)三位網上頻道「試當真」成員,早前接受黃Viu節目《同煲同BLOW》的訪問。三人以往不時為頻道的二創節目配音,許賢與蘇豪自認是動畫迷,坦言為動畫配音比劇集更方便:「因為動畫天馬行空,做配音時會彈性大啲,嘴形又會易配啲,相反劇集配音要配合返演員個嘴形逐粒音配,試過用咗足足一個星期去配一條短片,連行路聲、撳電話聲都要配埋。」至於Jackie偏愛日劇,更視玉木宏為頭號男神,她說:「玉木宏套《交響情人夢》我至少睇咗三次,好鍾意佢演一啲好王子狀態嘅角色,準備煲埋佢套《極道主夫》!」

三位嘉賓又即席接受配音挑戰,為最新古裝韓劇《衣袖紅鑲邊》配音,蘇豪以搞笑聲線反串配女主角李世榮,引得全場大笑,蘇豪指這把「謎之女聲」是偶然間發現:「我記得呢把怪聲係同許賢喺一個同學屋企發現,嗰時我發緊脾氣,但又想禮貌地發脾氣,唔想用真聲同對方溝通,最後就發現自己有呢把聲出現。」

即時娛樂