鍾嘉欣《仁醫》角色活潑得民心 網民力推拎返次視后

TVB台慶劇《星空下的仁醫》自周一(18日)首播後一直備受好評,三大主演馬國明、鄭嘉穎及鍾嘉欣的演技亦獲讚,三人間偶爾「你窒我我窒你」兼互不相讓的狀態,更令網民大呼過癮:「朋友就係咁。」三人當中尤以鍾嘉欣帶給觀眾最多驚喜,獲讚「演技大躍進」,網民更希望現居加拿大的她能憑《仁醫》勇奪視后:「呢次角色活潑得嚟唔太似以前嘅劇,自然咗好多」、「唔單止做得好過以前,仲要好靚女」、「佢今年係拎視后最好機會,佢過去咁多年都拎唔到,會多啲同情分,佢絕對值得拎返次視后」、「佢做專業人士好過成日喊」、「鍾嘉欣愈大愈靚」。觀乎嘉欣劇中表現,演技確是明顯較前成熟內斂,數幕內心戲亦拿捏得宜兼有感人位,難怪網民勁Buy。

今次是嘉欣首度飾演要應付手術場面的專科醫生,談到首度踏入手術室拍攝如此真實場面,嘉欣坦言有挑戰性:「我好鍾意手術室入面嘅戲,我好鍾意拍開刀同縫針戲,我發現原來我對呢樣嘢有興趣,同埋我唔驚見血。我好鍾意章以芯呢個角色,我覺得做醫生好有型,同埋著住手術袍感覺好專業,好有使命感。」嘉欣又坦言是次角色有一定難度:「最難係對白同醫療名詞要講得自然之餘,仲要Multi-Task,例如邊檢查邊將個情況解釋番畀個病患嘅父母聽;因為平時單要講大堆嘅對白已經好難,更何況要一路做住好多其他嘢一路講。」
繼吹笛病童喬喬(陳卓妍飾)個案睇到觀眾喊外,昨晚(22日)播出一集,催淚位則落在施焯日飾演的星仔身上,因患罕有病以致器官衰竭的星仔需接受心肝腎移植手術,但由於手術有爭議性事情一直被拖延,最終星仔病情惡化,自感時日無多的他含淚告別父母的一句:「爹哋媽咪對唔住,照顧唔到你哋。下一世,我都要再做你哋個仔。」這句「我要再做你哋個仔」令網民大呼感動,更戥星仔能否獲「生機」大感肉緊:「等到可以有手術,星仔又等唔到,編劇你同我出嚟!」、「好緊張呀!一定要撐住呀!」、「星仔捱唔捱到?」、「星仔等唔到器官移植,有啲傷感,想喊。」、「真係好慘,不過好寫實」。另外飾演怪獸家長Betsy的張秀文,亦獲網民讚演得入型入格,更有網民指她教囝囝光仔做功課教到大發雷霆一幕,是現實生活經常會在快餐店見到的真實情景。

即時娛樂